Përmes një operacioni të policisë greke është shkatërruar një grup kriminal të cilët drejtonin një rrjet prostitucioni.
Në pranga kanë rënë 12 persona mes të cilëve dhe 5 shqiptarë, ndërsa janë shpallur në kërkim edhe 8 persona të tjerë të cilët dyshohen të kenë lidhje me bandën.
Sipas policisë, grupi vepronte prej të paktën dy vjetësh. Rekrutonte femra në nevojë, kryesisht nga Shqipëria e Rumania dhe duke shfrytëzuar gjendjen e tyre të vështirë ekonomike, i fuste në rrugën e prostitucionit.
Nëpërmjet web site-ve të ndryshme që kishte krijuar, grupi reklamonte “shërbimet” e femrave dhe pastaj klientët i mbyllnin takimet duke telefonuar në një “call center” që funksiononte në lagjen Kalithea.
Mes femrave që përdorte grupi ishte dhe një e mitur nga Bullgaria, e cila tashmë po trajtohet në qendrën për viktimat e trafikut të qenieve njerëzore.
